‑Bo 'ma 'cɛ 'wɔn 'ma wlu 'mii 'de ɛ
81
Asafʋ 'a 'dʋ ‑ɛ ‑wlʋa 'e 'dʋ "jru o ‑tei klaa" 'a 'dʋ sbɛ 'di ɛ, ‑bo nyʋ a seɛ ble ɛ, Gaatɩ 'a ‑si' ‑plʋ mɛ nyɔ ɔ bla.
2 Ao ble ao 'je Kea 'da ɛmɛ ‑nɩ ‑aa 'kpɩ,
ao kpa 'mʋa‑ nʋ wlu "jɛi ao 'je Sakɔbʋ 'a Kea 'da.
3 Ao nʋ diin" o, ‑si' ‑plʋ o, plaadɩ "klein ao 'blea',
ao nʋɩ ao 'je Kea 'a 'nynɩ "i 'bɛɛ‑.
4 Ao bla ‑tiekɔin, ‑bo 'cʋ dee 'pɛɛn "kpae o,
‑bo 'cʋ nɩ 'e ‑kwea' 'de ‑aa ‑kɔ' nɔ".
5 Ɛ nɩ Israɛ ‑kɔʋn 'a kɛ' ‑o,
wlu Sakɔbʋ 'a Kea cɛan ‑tie" ‑o.
6 Ɛ nɩ kɛ' ‑o ‑ɛɛ ‑blaa 'de Sosɛfʋ 'a ‑tɩ' 'ʋn
‑ta ɔ ‑fɔan' Esipʋ o ɛ.
'Ɩn 'wɔn wlu jrɛ' 'maa 'wɔn 'mii.
7 'Ɩn ‑sa ‑ʋn kwaku ‑gbɛ "jru, ‑wɛe ‑ɩn ‑sa 'ʋn ''plɔɔ "i.
8 ‑Ta ‑ɩn ‑nɩa 'de 'kle 'di ɛ, ‑ɩn ‑da 'ʋn 'ɛ 'ɩn ji',
'ɩn ‑seie ‑ʋn ‑ɛ, ‑ta ‑piie a jia,
'ɩn 'wɔn ‑ma "wɔwlu 'mɛ.
'Bo Meriba' ‑gbuu ‑kwlɩ" 'bo 'ɩn ‑tɩn' ‑mii'.a ‑Te' ‑kwlʋ.
9 'Ma 'cɛ, ao po 'ma wlu doun" o 'ɩn 'je ao fɛn' ‑saa,
Israɛ ‑bo ao 'bɛɛ 'ma wlu doun" o poa' 'de ɛ.
10 ‑Mɛ Kea deejrɛ' se 'de aopʋ‑ o ‑gbu" mɔ nɩ i 'de,
‑mɛ ao se 'dʋɩ Kea deejrɛ' "juɛi ‑gbɛɛ'‑ i.
11 'Mɔ ‑nɩ Tʋ "bo, ‑ma Kea,
‑ɔ ‑sa ‑ʋn 'de Esipʋ ‑blʋa "kpei,
‑ɩn ‑bai' wɔn 'ma muɛ diiɛ "jiia'.
12 'Kaa 'ma 'cɛ se 'ma wlu doun" o po,
Israɛ se "mii nɩ 'bode.
13 'Ɩn 'bɔ ʋʋpʋ‑ 'mɛ 'de ‑jeblʋ ʋʋ ‑sa 'e mu 'a ‑tɩ' 'ʋn,
dɛ ‑nʋa' ʋʋpʋ‑ 'tʋn ʋʋ nʋɛ.
14 ‑Bo 'ma 'cɛ po 'ma wlu doun" o 'de ɛ,
'de ‑bo ‑jeblʋ 'ɩn tɔɔa Israɛnyʋ‑, ‑bo ʋʋa seɛ "i naa 'de ɛ,
15 'de "jriɛ ‑tɛ due' "i, 'ma muɛ ʋʋa' tʋnyʋ ja ‑gbaa',
‑wɛe nyʋ ‑ʋʋa ‑tua" ʋʋpʋ‑ 'kle 'ɩn 'je ʋʋpʋ bla.
16 Nyʋ ‑jʋ ‑a ‑flɛɛan Tʋ "bo ɛ,
ʋʋa muɛ ɛɛ' 'nynɩ "i 'bɛɛa',
‑wɛe Israɛ 'ɛ 'dɔe 'je 'ʋn ‑kwle.
17 Tʋ "bo a muɛ Israɛ ‑kɔʋn diiɛ 'dɔe "nyɩa,
‑wɛe dʋ 'a 'cna 'je ʋʋa' diiɛ nɩ‑.